Lipad Pinoy
Ang Lipad Pinoy ay isang panawagan upang muli nating buhayin at yakapin ang likas na kabutihan at kagalingan ng bawat Pilipino. Sa pamamagitan ng Lipad Pinoy, muling lilikhain ang isang kamalayang maka-Pilipino na ipinagmamalaki ang ating lahi at nagnananais na bumuo ng isang marangal na bansa. Ang Lipad Pinoy ay isang daan upang pag-isahin ang isang bayang may kakayahan at karangalang sumabay sa mga hamong nagmumula kaninuman at saanman.
Sa mahabang panahon, iminulat tayo sa isang kamalayan kung saan natuto tayong makontento sa kaisipang “na lang.” Nilagyan ng limitasyon ang ating maaabot at mararating. Kahit na nagkaroon ng isang sistemang demokratiko sa ating bansa, hindi pinansin ng mga sumakop at namuno sa ating bayan ang tinig nating mga ordinaryong mamamayan. Dahil dito, hindi nalinang ang kabutihan at kagalingan na likas sa bawat Pilipino.
Isinulat ni Francisco Balagtas ang katotohanang ito sa kanyang Florante at Laura, kung saan sinabi niya: “sa loob ng bayan kong sawi, kaliluha’y siyang nangyayaring hari...ang kagalinga’t bait ay nalulugami, inilibing sa dusa at pighati.” (Inside my suffering country, treachery is king, excellence and goodness are weakened and buried in anguish and misery) Naging gabay nina Rizal at ng iba pa nating mga bayani ang saloobing ito ni Balagtas. Dahil sa inspirasyong dulot nito, hinikayat tayo ng ating mga bayani na ipaglaban kung ano ang mabuti at tama, na maniwala sa likas nating kabutihan at kagalingan, at magtiwala sa ating kakayahan na isabuhay at ipagdiwang ang ating buti at galing bilang mga Pinoy.
Sa makabagong panahon at sa dala nitong hamon, kinakailangang likhain at buhaying muli ang ang pag-asa at karangalang likas sa atin at karapatang nasa sa atin. Ngayon higit kailanman, kailangan nating muling panindigan, at ipaglaban ang ating karangalan bilang mga Pilipino, lalong-lalo na sa harap ng laganap na kataksilan, kahirapan, at kasawiang-palad.
Kinakatawan ng makulay na saranggola na siyang tanda ng Lipad Pinoy ang ating sa ating mga pangarap at adhikain tungo sa isang magandang bukas; ang ating natatagong lakas; ang ating pagpapalipad sa ating likas na kagalingan at kabutihan. Kinakatawan din ng saranggola na ito ang ating pinag-isang lakas at pagsisikap na makalikha mula sa mga payak na gamit at katutubong kakayahan at yaman, at ang paliparin at pananatilihin ito sa himpapawarin, ang saranggola ng ating mga pangarap at adhikain.
Ipinagdiriwang ng Lipad Pinoy ang mga mahahalagang katangian tulad ng katapatan, karangalan, paggalang sa sarili, paglilingkod, pakikipag-kapwa tao at pag-ibig sa bayan – Nais ng Lipad Pinoy na palakasin at pagtibayin ang diwa ng pag-asa. Layunin din nito na himukin ang bawat Pilipino na makilahok at makibahagi sa dakilang gampanin ng pagbuo sa bayan ng ating pangarap, sa bayang ating pinapangarap. Hinihikayat tayo ng Lipad Pinoy na kumilos para sa bayan. Sinasamahan tayo ng Lipad Pinoy sa ating paglipad bilang isang sambayanan.
Lipad Pinoy! Gawin Natin. Kaya Natin.
