Ako ay tubong Bukidnon. Bagama’t napakasimple ng pamumuhay sa aming lalawigan sa Mindanao, lumaki ako sa pangangalaga ng mga magulang na may malakas na paniniwala na ang edukasyon ang pinakamahalagang kayamanan na matatamo ng isang tao sa kanyang buhay.
Hindi sila nag-iisa sa ganitong pananaw. Sa katunayan, maging ang mga katutubo ng Bukidnon na kilala bilang Lumad ay nagsisikap na pag-aralin ang kanilang mga anak sa kabila ng kawalan ng hanapbuhay at makakain. Kung tutuusin, saanmang dako ng Pilipinas, kung tatanungin ang isang magulang kung ano ang kanyang pangarap para sa kanyang anak, hindi nakakagulat na ang kanyang isasagot ay ang makapagtapos ito sa pag-aaral. Sa makatuwid, kung ang mga Pilipino ay likas na may pagpapahalaga sa edukasyon, bakit napakahirap pa rin para sa atin ang makamit ito?
